8M: Inspiratzen duten emakumeak
#oronawomen
04 Mar 2025
Oronan, berdintasuna egunero berritzen dugun konpromisoa da, gure erabakietan eta sortzen ditugun aukeretan islatzen dena. Bada une bat geldialdi bat egin eta gure taldeko emakumeen istorioei lekua emateko. Haien ahotsak entzun, esperientziak partekatu eta haien talentuak sektore honi egiten dion ekarpena balioan jarri nahi dugu, izan ere, aurrerapena pertsona bakoitzaren ekimenarekin eraikitzen da.
Susana Duque Dias
Orona Portugal-en zuzendaria
Nire esperientzian, Oronako Zuzendari gisa Brasilen eta Portugalen, ikasi dut lidergo eraginkorra testuinguru bakoitzaren berezitasunetara egokitzen jakitean oinarritzen dela. Gaitasun horri esker, erronka eraldatzaileei aurre egin, profesionalki hazi eta enpatiaz, entzute aktiboaz eta konfiantzaz bidea ireki ahal izan dut.
Brasilgo kulturara egokitzea, nahiz eta hizkuntza partekatzen genuen, burua irekita izatea eta taldeak helburu komunetara batzeko estrategiak garatzea eskatzen zuen, beti ere ingurune inklusibo eta motibatzailea sustatuz. Lider handiengandik asko ikasi dut, eta haiengandik jaso dut adibidez gidatzeko lezioa.
Portugalen, berriz, erronka bakarrei aurre egin behar izan nien, eta horrek erakundearen hazkunde jasangarria inspiratzen eta sustatzen lagundu dit. Harro nago emaitza iraunkorrak lortzeko gai diren eta garapen-aukerak eskaintzen dituzten talde sendoak osatu izanaz.
Esperientzia honek berresten du erresilientzia eta zailtasun bakoitza ikasteko aukera gisa ikusteko gaitasuna direla lidergo konbentzitu, profesional eta integritasedunean funtsezkoak.
Lidergo-postu batean emakume izatea, batez ere, etorkizuneko belaunaldiei bidea errazteko eta inspiratzeko ardura hartzea da, are gehiago historikoki gizonezkoen sektore batean. Uste dut oztopo bakoitza aukera bihur daitekeela, garapen pertsonala eta kolektiboa sustatzeko eta gure konbikzioa sendotzeko: berdintasunak eta ahalduntzeak etorkizun inklusiboago baten motor izan behar dute.
Horregatik, nire esperientzia eraldaketarako eta erronkei ausardiaz eta determinazioz aurre egiteko gonbidapen gisa definitzen dut. Benetako lidergoa garapen pertsonala eta taldearen hazkundea bateratzean sortzen da, oztopo bakoitza zerbait handiagoa eraikitzeko aukera bihurtzen denean. Horregatik, etorkizuneko emakume liderrak beren gaitasunetan sinesten jarraitzera animatzen ditut, eta erronka bakoitza hazteko aukera gisa bizitzera.
Bide honetan jarraitu nahi duten guztiei esango nieke integritatea, dedikazioa eta enpatiaz entzuteko gaitasuna lantzea funtsezkoa dela. Konpromisoarekin, lankidetzarekin eta aldaketa positiboa sustatzeko borondate sendoarekin, emakume bakoitzak ekarpena egingo dio etorkizun bati, non eskubideak, berdintasuna eta ahalduntzea errealitate bihurtuko diren. Bide horrek etorkizun justuago eta oparoago baterantz eramango gaitu guztiontzat.
Arrakasta ez da emaitzetan soilik neurtzen, baita lan-ingurune inklusibo eta inspiratzaile bat sortzeko ekarpenean ere.
Izaro Zulaika
Garapen Mekanikoko Arduraduna
Beti pentsatu izan dut irakasteko modurik onena adibidez erakustea dela. Uste dut funtsezkoa dela agerian uztea arlo teknikoa generotik independentea dela. Neska-mutilek ikusi behar dute emakumeak sektore honetan daudela, eta haiek ere rol teknikoetan aritu daitezkeela, jarduera horiek interesgarriak, dibertigarriak eta praktikoak direlako.
Nire interesa arlo honetan jakin-minetik eta gure eguneroko gauzak nola funtzionatzen duten ulertzeko gogo bizitik sortu zen. Inguratzen gaituzten arazoei irtenbideak bilatzeko eta etengabe hobetzeko grinak motibatu nau beti.
Etorkizuneko belaunaldietako emakumeei, arlo teknikoan interesa dutenei, aholkatuko nieke beraiek gogokoen eta motibagarrien zaien horretan irudikatzea, eta helburuak lortzeko ahalegina egitea. Bidea erronkez beteta egon daiteke, baina, azkenean, garrantzitsuena da norbera bere lekua dela sentitzen duen tokian egotea.
Maria Jesús Rodriguez
Andaluzia Ekialdeko Mantentze-lanetako Kudeatzailea
Nire garapen profesionala kudeaketa teknikoaren arlora bideratzeko arrazoi nagusia beti izan da baliabideen antolakuntzarekiko eta pertsonen kudeaketarekiko dudan interes handia. Egunez egun nire posizioan sendotu eta hazi naiz, gure proiektuan etengabe gaitasun berriak gehituz.
Etorkizuneko belaunaldiei emango nieken aholku nagusia da norberak bere bidea egitea, joera edo estereotipoek baldintzatu gabe, izan ere, horiek ez dira errealak. Helburu bat finkatzea eta horretan lanean jarraitzea da gakoa, beti geure burua eroso eta identifikatuta sentitzen dugun tokian egon ahal izateko.
Guztion ardura da lan-berdintasuna sustatzea, eta egun hau modu berdinzalean eta bateratuan ospatu ahal izatea lortzea.
Helburu bat finkatu eta horretan lan egin behar da, beti geure burua identifikatuen sentitzen dugun lekua bilatuz.
Garbiñe Usarralde
Fabrikazioko profesionala
Nekazal giroko familia xume batean hazi nintzen, eta oso gaztetatik ikasi nuen lan gogorraren balioa. Eskolara joan aurretik, atez ate esnea saltzen nuen, eta horrek ardura eta ahaleginaren garrantzia irakatsi zidan, batez ere baserri giro zorrotz horretan. Nire ibilbide profesionala elikagaien denda batekin hasi nuen, 13 urtez kudeatu nuena. Hala ere, osasun arrazoiengatik utzi behar izan nuen aldi batez, baina denbora hori aprobetxatu nuen prestakuntzan sakontzeko eta emakume mekanikarien ikastaro bat egiteko.
Enpresa ezberdinetan lan-esperientzia lortu ondoren, Oronako ekoizpen-planta batean lan egiteko aukera izan nuen, eta azken 20 urteetan hainbat arlotan aritu naiz bertan.
Nire esperientzian zehar, lan-baldintzak nola hobetu diren ikusi dut, bereziki ergonomiaren eta kargen manipulazioaren arloan. Horrek emakume gehiago produkzio-sektorean sartzea erraztu du, eta aukera berriak zabaldu ditu.
Azken finean, arduraz eta konpromisoz lan egiten baduzu, zure lorpenek beraiek hitz egingo dute zugatik.
Etorkizuneko belaunaldiei transmitituko nieke ahaleginarekin, konpromisoarekin eta erantzukizunez lan egitearen garrantzia. Garrantzitsua da ideiak ausardiaz, errespetuz eta zintzotasunez adieraztea, benetako eragina izateko.
Elena de Felipe
Salmenta Berriko teknikari komertziala
Beti interesatu izan nau arlo teknikoak, horregatik, nire ikasketak jarraitzeko norabidea aukeratu behar izan nuenean, ingeniaritzaren alde egin nuen.
Bestalde, nire lanak alde komertzial bat izateak motibagarri eta aberasgarri egiten du niretzat, aukera ematen baitit aldi berean arlo teknikoan hazteko eta erakundearen barruan zein kanpoan harremanak garatzeko. Postu dinamiko eta etengabeko ikaskuntzan oinarritua aurkitu dut, non balio erantsia eskaini eta horregatik aitortua izateko aukera dudan.
Etorkizuneko belaunaldiei gomendatuko nieke ez daitezela aurreiritziz eraman postu komertzialen inguruan, izan ere, horrelako lanek gaitasun ugari garatzeko aukera eskaintzen dute, ikuspegi tekniko hutsetik harago.
Garrantzitsuena beren buruengan eta gaitasunetan sinestea da, eta benetan ilusioa pizten dien horren aldeko apustua egitea. Ez dago beharrezkoa denaz harago ezer frogatu beharrik.
Ezagutza, lan ona, konpromisoa eta errespetua dira bidea sendotzen duten zutabeak. Balio horiek gidari izanik, zure helburuak lortzeaz gain, prozesua benetan gozatzea ere posible izango duzu.
Alejandra Borgas
Bizkaiko Kontserbazio Teknikaria
Txikitatik, beti gustatu izan zait robotika eta gauzak desmuntatu eta berriz muntatzea, haien funtzionamendua ulertzeko. Erdi-mailako ikasketak aukeratzeko momentuan, lagun batek elektromekanika mantentze-lanetako espezialitatea, bereziki igogailuena, gomendatu zidan. Ideia horrek berehala erakarri ninduen, eta aukera bat ematea erabaki nuen. Hasi bezain laster, elektrizitatearekin lotutako guztiaz maitemindu nintzen, bereziki motorren funtzionamenduaz.
Etorkizuneko belaunaldiei emango nieken aholku nagusia da bihotzari jarraitzea, berdin dio erizaintzan aritu edo lantegi batean lan egin nahi duten. Garrantzitsuena benetan nahi dutena egitea da, ez ingurukoek espero dutena. Azken finean, norberak biziko du bere egunerokoa, ez besteek.
Garrantzitsuena benetan nahi dutena egitea da, ez besteen itxaropenetara egokitzea. Azken finean, norberak biziko du bere egunerokoa, ez besteek.
Izaskun Edilla
Hernaniko Produkzio Zuzendaria
Nire ibilbidean, Produkzio, Muntaketa eta Kontserbazio arloetako Zuzendari gisa, gehienbat gizonezkoek osatutako sektoreetan lan egin dut. Hala ere, nire eguneroko jardunean, generoari buruz pentsatzen gelditzen naizen uneak gutxi dira. Askotan taldeko emakume bakarra izan naiz, baina hori ez da inoiz oztopo izan niretzat. Nire ikuspegia beti izan da talde bat garela, generoa alde batera utzita, nahiz eta zenbait esperientziak harritu nauten testuinguru honetan.
Txikitatik gustatu izan zaizkit Zientzia eta Teknologiarekin lotutako ikasgaiak, bereziki Fisika. Unibertsitateko bidea aukeratzeko momentuan, zalantzarik gabe, osagai tekniko handiena zuten ikasgaiak erakarri ninduten gehien, eta horregatik erabaki nuen Ingeniaritza ikastea. Behin lan-munduan sartuta, konturatu nintzen benetan atsegin nuena pertsonekin lan egitea zela: taldeak kudeatzea, lidergoa hartzea eta prozesuak etengabe hobetzea.
Etorkizuneko belaunaldiei emango niekeen aholkurik garrantzitsuena da borrokatu dezatela benetan gustatzen zaien horren alde, nahi dutena izan eta egin dezaten. Gustuko duzun zerbait aurkitzen duzunean, bidearen erdia eginda duzu jada. Eta inoiz emakume izateagatik erronka bati aurre egin behar badiozu, pentsa horrek indar handiagoa emango dizula aurrera jarraitzeko, izan ere, Zientziak eta Teknologiak ez dute generorik.
Etorkizuneko belaunaldiei emango niekeen aholku nagusia da benetan gustuko duten horren alde borrokatzea, izan eta egin nahi dutena lortzeko. Zerbait benetan gustatzen bazaizu, bidearen erdia jada egina duzu.
